STAR 3.0 Scheme 2026 | ஸ்டார் 3.0: தமிழகத்தில் விரைவில் அறிமுகமாக உள்ள இணையவழி ஆவணப் பதிவு முறை, அதன் அம்சங்கள், பயன்கள் மற்றும் TNPSC தேர்வு நோக்கிலான முக்கிய குறிப்புகள்.
STAR 3.0 Scheme 2026 | ஸ்டார் 3.0
பதிவுத் துறையை மேம்படுத்த ‘ஸ்டார் 3.0’ (STAR 3.0) என்ற அதிநவீன இணையவழிப் பத்திரப்பதிவு மென்பொருள் முந்தைய திமுக ஆட்சியில் கொண்டு வரப்பட்டது. நேரில் வராமலேயே ஆவணப் பதிவு செய்வது மற்றும் பத்திர உருவாக்கம் உள்ளிட்ட 18 சேவைகள் இதில் இடம்பெற்றுள்ளன. தற்போது இந்த இணையப் பதிவை முழுமையாகக் கட்டாயமாக்க தமிழக அரசு முடிவு செய்துள்ளது.
நேரில் வரத் தேவையில்லாத ஆவணங்களின் பட்டியல்:
- முதல் விற்பனை மனை (First sale plot).
- முதல் விற்பனை அடுக்குமாடி குடியிருப்பு (First sale apartment).
- தமிழ்நாடு வீட்டு வசதி வாரிய (TNHB) விற்பனை ஆவணங்கள்.
- வங்கிகளில் பெறும் கடனுக்கான அடமானம் (Mortgage) மற்றும் ரசீது ஆவணங்கள்.
புதிய நடைமுறையின் முக்கிய அம்சங்கள்
பதிவுத்துறை மேற்கொண்டுள்ள இந்த மாற்றத்தின்படி, நிலம் மற்றும் சொத்து தொடர்பான ஆவணங்களை இணையதளம் வாயிலாகவே பதிவேற்றம் செய்து பதிவு செய்ய முடியும். தற்போது பயன்பாட்டில் உள்ள முறையில், ஆவணங்கள் இணையத்தில் தயாரிக்கப்பட்டாலும், இறுதிக்கட்ட பதிவு நடவடிக்கைகளுக்காக சார்பதிவாளர் அலுவலகத்திற்கு நேரில் செல்ல வேண்டிய கட்டாயம் உள்ளது.
புதிய திட்டத்தின் கீழ்:
- ஆவணங்களை இணையத்தில் பதிவேற்றம் செய்யலாம்.
- பதிவு கட்டணம் மற்றும் முத்திரைத்தாள் கட்டணத்தை ஆன்லைனில் செலுத்தலாம்.
- ஆவண சரிபார்ப்பு பணிகளை இணையவழியிலேயே மேற்கொள்ளலாம்.
- பதிவுக்குப் பிறகு மின்னணு வடிவிலான பதிவு ஆவணங்களை பெறலாம்.
சார் பதிவாளர்களின் பங்கு
புதிய முறையில், சார்பதிவாளர்கள் ஆவணங்களின் சட்டப்பூர்வ தன்மை மற்றும் விவரங்களை சரிபார்க்கும் பொறுப்பை மேற்கொள்வார்கள். தேவையான இடங்களில் மட்டுமே நேரடி ஆய்வு அல்லது கூடுதல் சான்றுகள் கோரப்படும். இதன் மூலம் பதிவு செயல்முறை மேலும் எளிமையடையும்.
பொதுமக்களுக்கு கிடைக்கும் நன்மைகள்
இந்த இணையவழி பதிவு முறை அறிமுகமானால்:
- அலுவலகங்களில் காத்திருக்கும் நேரம் குறையும்.
- இடைத்தரகர்களின் தலையீடு குறையும்.
- பதிவு செயல்முறை வெளிப்படைத்தன்மையுடன் நடைபெறும்.
- ஆவணங்கள் பாதுகாப்பாக மின்னணு வடிவில் சேமிக்கப்படும்.
- ஊழல் மற்றும் தேவையற்ற செலவுகள் குறையும்.
அரசின் நோக்கம்
தமிழக அரசு அனைத்து சேவைகளையும் படிப்படியாக மின்னணு மயமாக்கும் முயற்சியின் ஒரு பகுதியாக இந்த திட்டத்தை செயல்படுத்துகிறது. இதன் மூலம் குடிமக்களுக்கு வேகமான, எளிமையான மற்றும் வெளிப்படையான சேவையை வழங்குவதே நோக்கமாகும்.
